Privaatheidsbeleid

Stapel is ’n gratis speletjie wat so min moontlik oor jou weet. Hier verduidelik ons presies wat ons stoor, hoekom, waar, hoe lank, en wat jou regte is. Dit voldoen aan die Wet op die Beskerming van Persoonlike Inligting 4 van 2013 (POPIA).

Kortom: spelers hoef niks te gee nie en jou speldata bly op jou eie toestel, tensy jy self met Google inteken om jou vordering te bêre (dit is nooit nodig om te speel nie; dan hou ons jou vordering en ’n nommer wat van jou Google-rekening gemaak is, nie jou naam of e-pos nie; jy kan dit enige tyd uitvee: afdeling 2d). Ons tel net anoniem hoe dikwels borge gesien word, hoe hoog die daaglikse torings kom en hoe dikwels uitslae gedeel word, ’n lewendige Uitdagersreeks-wedstryd hou jou (opsionele) bynaam en hoogtes hoogstens 7 dae, en die daaglikse ranglys wys jou bynaam en vandag se hoogte (30 dae; jy kan jou versteek) (afdeling 2). Net adverteerders (Borge) gee persoonlike inligting, en dit is net wat nodig is om hulle te faktureer en te kontak. Dit geld vir die webwerf en vir die Stapel-toep op Google Play (Android), wat dieselfde spel is.

1. Wie verantwoordelik is

Die “verantwoordelike party” (POPIA) vir inligting wat deur Stapel versamel word, is:

Regsnaam: Sportscard Trading (Pty) Ltd (op Google Play bekend as “Lekker Local”)
Registrasienommer: 2026/492510/07
Fisiese adres: 39 Delport Avenue, Oatlands, Krugersdorp, 1739
E-pos: lekkerlocal.apps@gmail.com
Telefoon: 081 264 6506
Inligtingsbeampte: Anandre Groenewald, lekkerlocal.apps@gmail.com

2. Spelers: wat ons versamel en wat nie

Om Stapel te speel hoef jy nie ’n rekening te maak of enige inligting in te tik nie. Inteken met Google is opsioneel (afdeling 2d).
Jou resultate, reeks, beste hoogte en instellings word net op jou eie toestel gestoor (sien afdeling 11) en word nie na ons gestuur nie. Die uitsonderings is die anonieme telling en die daaglikse ranglys hieronder, en, net as jy self met Google inteken, jou gebêrde vordering (afdeling 2d).
Ons gebruik geen ontledings- of opsporingsdienste van ander maatskappye nie, geen advertensienetwerke en geen koekies om jou te volg nie. Ons tel wel anoniem hoe dikwels borge gesien word en hoe goed die daaglikse toring gaan; presies wat, staan hieronder.
Wanneer jy jou resultaat deel, gaan dit deur jou eie program (soos WhatsApp). Ons ontvang dit nie; ons tel net anoniem dat die deel-knoppie getik is (afdeling 2a).
Die spel haal die lys van Borge, en hoeveel gratis pogings die Daaglikse Toring per dag het, by ons webwerf of bediener op. Dit is anonieme versoeke sonder enige inligting oor jou. Soos by enige webwerf sien die dienste wat die lêers uitstuur (afdeling 6) tegnies jou IP-adres; ons stoor dit nie en gebruik dit nie om jou te identifiseer nie.
Stapel is bedoel vir spelers van 13 jaar en ouer. Ons vra nooit vir ’n speler se regte naam, e-pos of ander kontakbesonderhede nie. Die enigste speler-inligting wat ons ’n ruk lank hou, is: vir die daaglikse ranglys jou bynaam, jou lukrake spelernommer en jou resultaat (hoogte, blokke, speeltyd en pogings), 30 dae lank; en ná ’n lewendige wedstryd ’n opname met jou bynaam en hoogtes, 7 dae lank. Daarna word dit outomaties uitgevee (hieronder). As jy self met Google inteken, hou ons ook jou gebêrde vordering tot jy dit uitvee (afdeling 2d). Gebruik asseblief nie jou volle naam as bynaam nie.

Anonieme tellings

Wanneer ’n speletjie klaar is, en wanneer jy ’n deel-knoppie op die uitslae tik, stuur die spel een klein boodskappie na ons bediener, maar net as ons bediener aan is. Dit is net getalle by ’n datum:

Wat getel word: die datum; of dit die Daaglikse Toring of ’n oefenspeletjie was; hoeveel keer elke borg se naam op ’n blok was wat jy laat val het; watter borg se advertensiebord op die eiland gestaan het; of die advertensie op die kieslys gewys is; en hoeveel keer die deel-knoppies op die uitslae getik is (net ’n getal per dag en soort spel).
Die Daaglikse Toring: jou hoogte (in stappe van 0,5 m) word by ’n lys met almal se resultate van daardie dag getel. Daarmee kan die spel sê “Jy het vandag beter gevaar as 72% van die spelers”. Die lyn verskyn eers as minstens 10 mense gespeel het. Die resultaat word hoogstens een keer per dag per toestel gestuur.
Wat nooit gestuur of gestoor word nie: jou naam, e-posadres, IP-adres, toestel-ID, koekies, die tyd van die dag of enigiets anders wat een speler van ’n ander onderskei. Ons stoor net totale (“daar was 412 speletjies op 6 Oktober”), nie ’n lys van wie gespeel het nie, en dit kan nie aan jou gekoppel word nie. Dit is dus nie persoonlike inligting nie.
Misbruik keer: om te keer dat een rekenaar die getalle opjaag, onthou die bediener jou netwerkadres hoogstens ’n uur lank in sy geheue, as ’n sleutel wat elke dag verander (dit kan nie na ’n adres teruggewerk word nie). Dit word nie in die databasis of logboeke gestoor nie.
Hoekom: sodat ons Borge kan vertel hoe dikwels hul naam gesien is (hulle kry ’n maandelikse verslag), en om die daaglikse vergelyking te kan wys.
Hoe lank: hierdie totale word ongeveer 13 maande gehou en dan outomaties uitgevee.
Is ons bediener af of is jy sonder internet? Dan word niks gestuur nie en die spel werk net soos gewoonlik.

Uitdagersreeks (kop-aan-kop)

Teen Robot Rikus of met ’n skakel: niks word na ons gestuur nie. ’n Uitdagingskakel wat jy self deel, bevat jou bynaam en jou toring se hoogte sekonde vir sekonde. Wie die skakel kry, kan dit sien.
Lewendige wedstryde: die bediener stuur jou bynaam, jou spelerkaart (jou voorkoms, jou rang en die blokke wat jy gekies het) en jou hoogte aan jou teenstander deur terwyl julle speel, en in ’n muntwedstryd hoeveel munte elkeen insit; in Blok vir Blok ook elke blok wat jy laat val en hoe die toring daarna staan, en in albei die emoji’s wat jy stuur (ses vaste prentjies, geen geskrewe boodskappe nie). Ná die wedstryd hou dit ’n opname (die bynaam en die hoogtes, sonder enigiets anders) hoogstens 7 dae lank, sodat ’n speler wat niemand kry om teen te speel nie, teen ’n regte wedstryd kan speel. Daarna word dit outomaties uitgevee.
’n Vriend se skakel: wie ’n kamerskakel (?kamer=) oopmaak, sien die bynaam van wie uitnooi en watter soort wedstryd dit is. Tik hulle “Sorry, besig nou” (of, by ’n muntwedstryd, “Laat weet: te min munte”), kry die een wat uitgenooi het hul bynaam (en, by ’n muntwedstryd, dat hulle te min munte daarvoor het); ’n ouer Stapel wat ’n muntwedstryd-skakel oopmaak, gee sy bynaam ook deur, en die een wat uitgenooi het, lees dat dit nog nie muntwedstryde ken nie. Die kamer hou hoogstens 5 sulke antwoorde totdat daardie speler se spel terug is, en vergeet alles wanneer die kamer toegaan (hoogstens ’n paar minute ná die wedstryd).
Terug ná ’n verbinding wat weg was: die spel stuur ’n lukrake kode wat net vir daardie een kamer geld, sodat jy jou eie plek terugkry. Dit word nêrens anders gebruik nie en verdwyn saam met die kamer.
Wat nooit gestoor word nie: jou IP-adres, toestel-ID, koekies of enigiets anders wat na jou terugwys. Jou bynaam is opsioneel; sonder een speel jy as “Bouer” met ’n nommer.

Daaglikse ranglys

Wat gestuur word: wanneer jy die Daaglikse Toring klaar gespeel het, stuur die spel jou bynaam (of “Bouer” met ’n nommer as jy nie een gekies het nie), jou toring se hoogte, hoeveel blokke jy laat val het, hoe lank jy gespeel het en hoeveel pogings jy daardie dag gespeel het (die gratis pogings en “Nog ’n kans”), saam met ’n lukrake spelernommer. Daardie nommer word een keer op jou toestel gemaak en bly dieselfde totdat jy die spel se data uitvee (afdeling 11). Dit is aan niks anders gekoppel nie en dien net om jou plek op die ranglys te ken, behalwe as jy met Google inteken: dan is die nommer ook in jou gebêrde vordering (afdeling 2d), en “Vee my rekening uit” vee dan ook jou ranglys-inskrywings uit. Die bediener hou ook by wanneer jou resultaat eerste aangekom het (as die hoogtes gelykop is, is wie minder pogings gespeel het voor, en dan wie se resultaat eerste aangekom het). Die blokke en die tyd gebruik ons net om onmoontlike resultate te weier.
Wie dit sien: die beste tien van die dag word met hul bynaam en hoogte gewys; elke speler sien ook hul eie plek. Skakel “Wys my op die ranglys” af en ander sien jou nie meer nie (jy sien steeds jou plek). Ons kan ’n inskrywing met ’n onvanpaste bynaam of ’n onmoontlike resultaat van die lys afhaal.
Hoe lank: 30 dae, dan word dit outomaties uitgevee. Jou IP-adres word nie gestoor nie; net ’n daaglikse gehashte afleiding daarvan word kort in die geheue gehou om misbruik te keer, soos by die anonieme tellings.
Vroeër uitvee: stuur ons die datum en jou bynaam (afdeling 9), dan vee ons jou inskrywing uit.

Bêre jou vordering (inteken met Google)

Opsioneel: onder ⚙️ Instellings → ☁️ “Bêre jou vordering” kan jy met jou Google-rekening inteken. Dan is jou torings, munte, voorkoms en range veilig, en dieselfde op jou foon en die webwerf. Inteken is nooit nodig om te speel, in die Winkel te koop of ’n wedstryd te speel nie: sonder om in te teken, werk die spel presies dieselfde. As jy jonger as 18 is, teken net in as jou ouer of voog sê dis reg (POPIA artikel 35).
Wat Google vir ons gee: wanneer jy inteken, gee Google die spel ’n getekende “inteken-bewys” met jou Google-rekening se nommer, naam, e-posadres en foto. Ons bediener toets dit by Google en hou dan net ’n nommer wat van jou Google-rekening se nommer gemaak is met ’n geheime sleutel (dit kan nie na jou Google-nommer teruggewerk word nie). Jou naam, e-pos en foto word nooit gestoor nie.
Wat ons hou: jou vordering soos die spel dit op jou toestel hou (jou voltooide torings en statistiek, Oefen se beste, jou Uitdagersreeks-bynaam en -rekord, munte, kragte, voorkoms, jou toring se styl, range, die Daaglikse Toring se ekstra pogings en hoeveel jy gebruik het, die weekkis, hoeveel keer jy “Vul my munte aan” gebruik het, die dag van ’n toetser-geskenk, jou lukrake spelernommer vir die ranglys en dié wat jou ander toestelle voorheen gebruik het (hoogstens 8)), wanneer die rekening gemaak en laas gebruik is, en vir elke toestel waarop jy ingeteken is ’n lukrake sessiekode (net ’n vingerafdruk daarvan). ’n Toring wat jy op daardie oomblik bou, en munte wat in ’n muntwedstryd vasgehou word, word nie gestuur nie (hulle bly op daardie toestel).
Wat jy koop, bly joune: wat jy met munte koop, bly in jou gebêrde vordering, ook wanneer ’n ouer weergawe van die spel dit nog nie ken nie.
Hoekom: sodat jou vordering nie verlore gaan nie (’n nuwe foon, of blaaierdata wat uitgevee is) en dieselfde is op al jou toestelle.
Hoe lank: totdat jy dit uitvee. ’n Rekening wat 2 jaar lank nie gebruik is nie, word outomaties uitgevee; ’n toestel se intekening wat 400 dae nie gebruik is nie, verval.
Uitteken: dit beëindig net daardie toestel se intekening. Alles bly op die toestel, en jou rekening hou sy afskrif totdat jy weer inteken.
Google self: die inteken gebeur by Google, volgens Google se eie privaatheidsbeleid. Op die webwerf word Google se “Sign in with Google”-knoppie (van accounts.google.com) eers gelaai wanneer jy ⚙️ Instellings oopmaak, of wanneer die spel een keer aanbied om jou vordering te bêre (op die uitslae ná ’n nuwe beste, of in die Winkel ná ’n aankoop), en net as inteken oop is en jy nog nie ingeteken is nie; in die Android-toep vra die foon self vir Google.

Die toetsers se stemming oor nuwe idees (Oktober 2026)

Wat: op die proefblad “Die Lewende Toring” (stapelspel.pages.dev/lewende-toring/) kan jy stem watter van drie nuwe idees jy die beste hou. As jy stem, stuur jy jou naam of bynaam, jou keuse, ’n rede as jy een skryf, en watter van die idees jy gespeel het, saam met ’n lukrake stemnommer wat die blad op jou toestel hou (sodat jy jou stem kan verander in plaas van twee keer te stem). Die blad vul die naam vooraf in met jou Uitdagersreeks-bynaam op hierdie toestel; dit gaan net weg as jy op “Stem” tik.
Hoekom: sodat ons kan sien watter idee die toetsers wil hê, en hul redes kan lees. Net die eienaar sien die name en redes; ons publiseer dit nie.
Hoe lank: stemme word tot 31 Oktober 2026 aanvaar, en almal word op 8 November 2026 outomaties uitgevee. Wil jy jou stem vroeër uitgevee hê, skryf aan ons (afdeling 9) met die naam waarmee jy gestem het.
Jonger as 18? Vra eers jou ouer of voog. ’n Bynaam is genoeg; skryf nooit ’n telefoonnommer of adres nie (die bediener weier dit).

Ons dorp (jou ploeg, die Weektoring en Saterdag)

Wat gestuur word: as jy Ons dorp oopmaak, stuur die spel ’n lukrake spelernommer met ’n geheime kode (albei op jou toestel gemaak; die bediener hou net ’n vingerafdruk van die kode), jou Uitdagersreeks-bynaam (of “Bouer” met ’n nommer), jou blokke se styl, hoe hoog jou Daaglikse Toring elke dag van hierdie week gestaan het, en hoe jou jongste Daaglikse Toring gestaan het (elke blok se vorm, kleur en plek, om op julle eiland te staan). As jy bou, die rivier af gly of bomme gooi, stuur dit die vloere wat jy gebou het (elkeen se vorm, kleur, plek en hoe dit geland het), hoeveel mense jy gered het, en waar elke bom geland het.
Wat die bediener hou: jou ploeg (sy naam, sy lede se byname, style en elkeen se jongste Daaglikse Toring, hoogstens drie), die ploeg se Weektoring (elke vloer en wie dit gebou het), sy mense, sy nuus en sy monumente (vorige weke se torings); vir jou, hierdie week se Daaglikse hoogtes, jou boubeurte en bomme gebruik, en of jy vandag die rivier af gegly het; Saterdag jou rivier: die vier ploeë se name en hoogtes, die bomme wat raak was en die eindstand en pryse.
Wie sien dit: jou ploeg sien alles. Saterdag sien die ander drie ploeë op jou rivier jou ploeg se naam, sy toring en hoogte, en die nuus van bomme. Wie jou ploeg se uitnodigskakel oopmaak, sien die ploeg se naam en wie daarin is, en kan aansluit solank daar plek is.
Misbruik keer: die bediener tel hoeveel versoeke elke uur van een adres kom. Jou IP-adres word nie gestoor nie; net ’n daaglikse gehashte afleiding daarvan word kort in die geheue gehou, soos by die ranglys.
Hoe lank: ’n Saterdag se rivier (die stand, bomme, nuus) word ses weke later outomaties uitgevee. Jou ploeg en jou spelerrekord bly tot jy vra dat ons dit uitvee (skryf aan ons, afdeling 9, met jou ploeg se naam). As jy ’n ploeg verlaat, gaan jy en jou bynaam daarvan af.
Jonger as 18? Vra eers jou ouer of voog. ’n Bynaam is genoeg; die bediener weier rowwe name, telefoonnommers en adresse.

Jou dorp (Steel en Wraak)

Sedert 1.20: die spel gebruik nie meer Jou dorp of die Kasteelreeks hieronder nie; wat die bediener daarvan gehou het, bly tot jy vra dat ons dit uitvee.
Wat: as die bediener Jou dorp ken, stuur die spel jou dorp se nommer, jou Uitdagersreeks-bynaam (of “Bouer” met ’n nommer), jou stam, hoeveel mense (ook goue mense), strooptogte en mure jou torings verdien het, en die landmerke wat jy gekoop het. Die bediener hou jou dorp: die getalle, wie jou bure is, en die nuus van strooptogte (wie by wie gesteel het, hoeveel en wanneer).
Wie sien dit: jou bure (vriende wat jou skakel oopgemaak het, of by wie jy gesteel het) sien jou bynaam, stam en getalle. ’n Strooptog se skakel wys wie by wie gesteel het, en hoeveel.
Misbruik keer: die bediener tel hoeveel nuwe dorpe en versoeke van een adres kom, en hoeveel keer ’n dorp elke uur beroof word. Jou IP-adres word nie gestoor nie; net ’n daaglikse gehashte afleiding daarvan word kort in die geheue gehou, soos by die ranglys.
Hoe lank: tot jy vra dat ons jou dorp uitvee (skryf aan ons, afdeling 9, met jou dorp se nommer). Dit vee jou kasteel saam uit.
Jonger as 18? Vra eers jou ouer of voog. ’n Bynaam is genoeg; die bediener weier rowwe name, telefoonnommers en adresse.

Die Kasteelreeks (vriende se kastele)

Wat: as die bediener Jou dorp ken, stuur die spel jou kasteel saam met jou dorp se nommer: hoe jou laaste vyf Daaglikse Torings gestaan het (elke blok se vorm, plek, kanteling en of dit Perfek, Goed of Skeef was), jou verdedigingsplan en die kasteel se saadnommer, sodat jou bure dit kan aanval. Val jy ’n buurman se kasteel aan, stuur die spel hoeveel sterre jy gekry het en hoeveel van die kasteel geval het; dit word hul nuus (wie, wanneer en hoeveel).
Wie sien dit: jou bure (Jou dorp, hierbo) sien jou kasteel en jou bynaam; jy sien die nuus van aanvalle op jou kasteel.
Hoe lank: tot jy vra dat ons jou dorp uitvee (dit vee jou kasteel saam uit).

Blokbotsing

Teen Robot Rikus: niks word gestuur nie.
Teen ’n vriend (met ’n kamerskakel): terwyl julle speel, gee die bediener jou bynaam, die styl van jou blokke, hoeveel ekstra blokke jou Daaglikse Toring jou gegee het, en elke beurt (die kaart wat jy kies, waar jy bou of hoe jy gooi, en hoe die torings ná die beurt staan) aan jou vriend deur. Niks daarvan word gestoor nie: die kamer vergeet alles wanneer dit toegaan (hoogstens ’n paar uur nadat dit oopgemaak is). Om misbruik te keer, tel die bediener hoeveel kamers een adres oopmaak, soos hierbo.

Saam gly

Terwyl julle saam gly (met ’n kamerskakel): die bediener gee jou bynaam, die styl van jou blokke en, ’n paar keer per sekonde, waar jy op die rivier is (meter, baan, ’n sprong of ’n koes, jou harte), jou stampe, jou eindmeter en ’n “weer saam” aan jou vriend deur, sodat julle mekaar op die water sien. Niks daarvan word gestoor nie: die kamer vergeet alles wanneer dit toegaan (hoogstens ’n paar uur nadat dit oopgemaak is). Jou meter tel vir die dag se Afgly-ranglys soos enige rit. Om misbruik te keer, tel die bediener hoeveel kamers een adres oopmaak, soos hierbo.
’n Teenstander soek: terwyl jy soek, hou die bediener jou bynaam en ’n lukrake kode wat net vir daardie een soektog gemaak is (sodat ’n foon wat van ’n ander app af terugkom, sy eie plek terugkry); die speler met wie jy gepaar word, sien jou bynaam. Albei gaan sodra julle gepaar is, of wanneer jy ophou soek. ’n Kamer kry ook so ’n kode van elke foon, sodat ’n foon wat sy verbinding verloor het, sy eie plek terugkry; dit gaan saam met die kamer.

Hengel (die grootste vis van die dag, die maand en die jaar)

Wat gestuur word: as Oom ná jou Daaglikse Toring ’n vis vang, stuur die spel dieselfde lukrake spelernommer en geheime kode as die Afgly (met jou bynaam), die dag, die soort vis, sy gewig, of die haai net die kop gelos het, en of jy op die ranglys gewys wil word (die ranglys se “Wys my”).
Wat die bediener hou: jou grootste vis van die dag, van die maand en van die jaar (die soort, die gewig en jou bynaam), en hoeveel visse jy vandag gevang het (net om bedrog te keer).
Wie sien dit: enige speler sien die top 10 van die dag, die maand en die jaar: die bynaam, die vis en sy gewig. Skakel “Wys my” af, dan hou jy jou plek maar jou naam wys nie.
Hoe lank: ’n dag se ranglys word ná 8 dae uitgevee, ’n maand s’n ná 14 maande en ’n jaar s’n ná 3 jaar.

Jou rekening uitvee

In die spel: ⚙️ Instellings → “Vee my rekening uit”. Dit vee jou rekening, jou gebêrde vordering, al jou toestelle se intekenings en jou name op die daaglikse ranglys dadelik uit, en binne 7 dae ook uit ons databasis se herstel-kopie by Cloudflare. Wat op jou toestel self gestoor is (afdeling 11), bly daar totdat jy dit uitvee.
Sonder die toep: maak stapelspel.pages.dev/?rekening op enige foon of rekenaar oop, teken in met dieselfde Google-rekening en kies “Vee my rekening uit”.
Per e-pos: skryf aan lekkerlocal.apps@gmail.com (afdeling 9). Ons antwoord binne 30 dae en help jou om dit self uit te vee, in die spel of by stapelspel.pages.dev/?rekening. Ons kan nie self jou rekening vind nie, want ons hou nie jou naam of e-pos nie. ’n Rekening waarby niemand meer inteken nie, word ná 2 jaar sonder gebruik vanself uitgevee.

Nuus op jou foon (die Android-toep)

Net as jy dit toelaat: in die Android-toep vra Android een keer of Stapel kennisgewings mag wys (dieselfde vraag as die daaglikse herinnering). As jy dit toelaat, sluit die toep by ons nuuslys by Firebase Cloud Messaging aan, Google se kennisgewingdiens, sodat ons ’n kort boodskap oor ’n nuwe weergawe of Stapel-nuus kan stuur.
Wat gemaak word: Firebase maak ’n adres vir die toep op jou foon (’n lukrake installasienommer en ’n kennisgewingtoken). Dit is nie aan jou bynaam, jou rekening of jou vordering gekoppel nie, en ons sien nie wie op die lys is nie: elke boodskap gaan na almal op die lys. Niks oor hoe jy speel word gestuur nie. Die webwerf stuur geen kennisgewings nie.
Om dit te stop: skakel kennisgewings vir Stapel in jou foon se instellings af, of verwyder die toep; die adres werk dan nie meer nie en Google vee dit uit.

Munte koop (die Android-toep)

Wanneer jy ’n muntpakkie koop, hanteer Google die betaling: ons sien nooit jou kaart- of bankbesonderhede nie. Om die munte te lewer en te help as iets skeefloop, hou ons bediener saam met jou rekeningnommer (afdeling 2: nie jou naam of e-pos nie): die pakkie, Google se bestelnommer en aankoopteken, die datum en tyd, die munte wat gelewer is, en of die koop later terugbetaal is. Ons bediener gaan elke koop by Google na voordat die munte aankom. Die reëls vir koop staan in ons spelvoorwaardes.

3. Borge: wat ons wel versamel

Let wel: aanlyn borgskappe is nog nie oop nie. Hierdie afdeling (en wat verder oor Borge en betalings staan) beskryf wat sal geld sodra dit begin.

As jy op Stapel adverteer, versamel ons:

Vir die advertensie: jou besigheidsnaam, en by die advertensiebord ’n opsionele slagspreuk en webwerf-adres.
Om jou te kontak: jou kontakpersoon se naam, jou e-posadres en ’n opsionele telefoonnommer.
Betalingsinligting: jou kaartbesonderhede word net deur Paystack hanteer; ons sien of stoor dit nooit nie. Ons ontvang van Paystack ’n kliëntkode, ’n intekeningkode, die bedrag, datum en status van elke betaling, en die plan wat jy gekies het.
Toestemmingsrekord: watter weergawe van die Borgskap-voorwaardes en hierdie beleid jy aanvaar het, en wanneer. Ons stoor ook ’n gekodeerde (gehashte) afleiding van jou IP-adres, nooit die IP-adres self nie. Dit help ons om misbruik en herhaalde pogings te stop.
Tegniese rekords: kopieë van die boodskappe wat Paystack ons stuur oor jou betalings (met kaart- en IP-besonderhede reeds verwyder), om foute te kan opspoor.

Jy gee dit vrywillig, deur die vorm in te vul. Sonder hierdie inligting kan ons nie jou advertensie en betalings bestuur nie.

4. Hoekom ons dit gebruik

Jou advertensie vertoon, jou intekening bestuur en jou maandeliks faktureer: Dit is nodig om ons ooreenkoms met jou uit te voer.
Rekeninge, kwitansies en belastingrekords hou: Wetlike verpligting (belasting- en boekhouwetgewing).
Jou e-pos oor jou intekening: betalings, kansellasie, wysigings, verwydering: Uitvoering van die ooreenkoms.
Bedrog, misbruik en herhaalde pogings keer; die stelsel beveilig: Ons wettige belang en jou belang by ’n veilige stelsel.
Ons regte beskerm en op klagtes of eise antwoord: Ons wettige belang; wetlike verpligting.
Jou vordering bêre (spelers wat met Google inteken, afdeling 2d): Jou toestemming: jy kies self om in te teken (POPIA artikel 11(1)(a)). Trek dit terug met “Vee my rekening uit”.

Ons verkoop nie jou inligting nie, deel dit nie vir bemarking nie en stuur jou nie bemarking sonder jou toestemming nie.

5. Wat openbaar is

Jou besigheidsnaam, slagspreuk en webwerf-adres word in die spel gewys en is deel van die openbare lys van Borge wat enigiemand by ons bediener kan aflaai. Jou kontakpersoon, e-pos, telefoonnommer en betalingsinligting is nooit deel van die openbare lys nie.

Spelers: op die daaglikse ranglys sien almal wat speel die bynaam en hoogte van die dag se beste tien, met ’n 🔁 en die getal ekstra pogings by wie daardie dag meer as een poging gespeel het (gratis of met “Nog ’n kans”), behalwe dié wat “Wys my op die ranglys” afgeskakel het (afdeling 2). Die lukrake spelernommer word nooit gewys nie.

6. Wie nog jou inligting hanteer (operateurs) en oorgrensoordragte

Ons gebruik die volgende diensverskaffers (“operateurs” onder POPIA) om Stapel te laat werk. Hulle verwerk inligting net vir ons doeleindes en volgens hul eie voorwaardes en privaatheidsbeleide.

Paystack: Betalings en maandelikse intekeninge. Hanteer jou e-pos, jou kaartbesonderhede (net by Paystack) en jou betalingsdata.
Cloudflare: Stuur die speletjie en hierdie bladsye uit (Cloudflare Pages, stapelspel.pages.dev), en ons bediener (Workers) en databasis (D1, in Wes-Europa) vir die anonieme tellings, die daaglikse ranglys, die Uitdagersreeks se lewendige wedstryde, die gebêrde vordering van spelers wat inteken en die Borge-stelsel. Hanteer die inligting in afdelings 2 en 3 en tegniese versoeke, en sien tegnies die IP-adres van elkeen wat ’n bladsy oopmaak.
Google (Sign in with Google): Net as jy self met Google inteken (afdeling 2d): Google bevestig wie jy is. Ons kry van Google net die inteken-bewys en hou daarvan net ’n nommer wat van jou rekening se nommer gemaak is.
GitHub (GitHub Pages): Die ou adres van die speletjie (anandregroenewald.github.io/Toring) stuur besoekers net aan na die nuwe een. Sien tegnies die IP-adres van elkeen wat daardie ou adres oopmaak.
Google Play: Versprei die Android-toep. Wat Google oor jou weet wanneer jy die toep aflaai, val onder Google se eie privaatheidsbeleid; ons kry daarvan net anonieme totale (soos die aantal installasies).
Google (Firebase Cloud Messaging): Net in die Android-toep, en net as jy kennisgewings toelaat (afdeling 2, “Nuus op jou foon”): bring ons nuusboodskappe na jou foon. Dit hanteer die toep se kennisgewingadres namens ons.

Oorgrensoordragte (POPIA artikel 72): hierdie verskaffers verwerk data in ander lande, onder meer buite Suid-Afrika. Ons gebruik hulle omdat dit nodig is om ons ooreenkoms met jou uit te voer, en omdat hulle deur ooreenkomste of wette gebind word wat jou inligting soortgelyk beskerm. Deur as Borg in te teken, stem jy hiermee in.

7. Hoe lank ons dit hou

Onvoltooide inskrywings (jy het nie betaal nie): ná 7 dae gemerk as verlate; ná 30 dae word jou naam, e-pos en telefoonnommer uitgevee.
Betalingsrekords (bedrag, datum, verwysing): 5 jaar, soos belasting- en boekhouwetgewing vereis.
Rekords van muntaankope (afdeling 2, “Munte koop”): 5 jaar, soos belasting- en boekhouwetgewing vereis (as jy jou rekening vroeër uitvee, hou ons hulle sonder jou rekeningnommer).
Kopieë van Paystack-boodskappe: die inhoud word ná 90 dae uitgevee; ’n kort logboekinskrywing bly ongeveer 400 dae.
Kontakinligting van gewese Borge: hoogstens 24 maande ná jou advertensie geëindig het, of vroeër op jou versoek, behalwe wat ons vir rekeninge moet hou.
Toestemmingsrekords: solank jou rekord bestaan, as bewys van wat jy aanvaar het.
Anonieme tellings van speletjies (afdeling 2): ongeveer 13 maande, dan word dit outomaties uitgevee.
Opnames van lewendige Uitdagersreeks-wedstryde (afdeling 2): hoogstens 7 dae, dan word dit outomaties uitgevee.
Die daaglikse ranglys (afdeling 2): 30 dae, dan word dit outomaties uitgevee.
Ons dorp se Saterdag-riviere (afdeling 2): ses weke, dan word dit outomaties uitgevee. Jou ploeg en spelerrekord: tot jy vra dat ons dit uitvee.
Die toetsers se stemme (afdeling 2): tot 8 November 2026, dan word almal outomaties uitgevee.
Gebêrde vordering (afdeling 2d, net as jy inteken): totdat jy dit uitvee; ná 2 jaar sonder gebruik outomaties uitgevee.
Nuuskennisgewings (afdeling 2, net in die toep as jy dit toelaat): die adres werk totdat jy die toep verwyder of kennisgewings afskakel; Google verwyder adresse wat sowat nege maande nie gebruik is nie.

8. Hoe ons dit beskerm

Alle verkeer gaan oor https. Kaartbesonderhede raak nooit ons bediener aan nie.
Boodskappe van Paystack word met ’n kriptografiese handtekening gestaaf; vals boodskappe word geweier.
Geheime sleutels is nie in die kode nie maar veilig by Cloudflare. Net die eienaar het toegang tot die adminbladsy, met ’n lang geheime token.
Ons stoor so min as moontlik, en inligting wat uitgevee word (afdeling 7), word werklik verwyder, binne 7 dae ook uit ons databasis se herstel-kopie by Cloudflare.
Gebeur ’n veiligheidsbreuk wat jou inligting raak, dan lig ons jou en die Inligtingsreguleerder in soos POPIA vereis.

9. Jou regte

Onder POPIA mag jy:

vra of ons inligting oor jou het, en ’n afskrif kry (artikel 23);
vra dat verkeerde inligting reggemaak of onnodige inligting uitgevee word (artikel 24);
beswaar maak teen die verwerking van jou inligting, of jou toestemming terugtrek (artikel 11);
vra dat jou inligting nie vir direkte bemarking gebruik word nie (ons doen dit nie);
klag by die Inligtingsreguleerder (afdeling 10).

Stuur jou versoek per e-pos aan ons Inligtingsbeampte by lekkerlocal.apps@gmail.com. Ons antwoord binne ’n redelike tyd, gewoonlik binne 30 dae. Ons mag jou identiteit eers bevestig. Sommige rekords (soos betalings) moet ons volgens wet hou, al vra jy om uitwissing. Jy kan ook jou intekening enige tyd kanselleer (die Borgskap-voorwaardes verskyn saam met die eerste borgskappe).

10. Klagtes

Kontak ons asseblief eers; ons wil dit graag regmaak. Is jy nie tevrede nie, dan kan jy by die Inligtingsreguleerder (Suid-Afrika) kla:

Webwerf: https://inforegulator.org.za
Klagtes (e-pos): POPIAComplaints@inforegulator.org.za (met die voorgeskrewe klagtevorm, POPIA-vorm 5)
Telefoon: 010 023 5200
Adres: JD House, 27 Stiemens Street, Braamfontein, Johannesburg, 2001

11. Wat op jou toestel gestoor word

Stapel gebruik die berging van jou blaaier, nie koekies om jou te volg nie. Hierdie berging self word nie na ons gestuur nie. Wat wel weggaan, staan in afdeling 2: die anonieme tellings; vir die daaglikse ranglys jou bynaam, die lukrake spelernommer uit stapel.v1.board en die getal pogings uit stapel.v1.retry; en in ’n lewendige wedstryd jou bynaam en spelerkaart (jou voorkoms en blokke uit stapel.v1.econ en jou rang uit stapel.v1.ranks), en in ’n muntwedstryd hoeveel munte julle elk insit.

stapel.v1: Jou resultate, reeks, beste hoogte, jou Uitdagersreeks-bynaam en -rekord (en die soort wedstryd en munte wat jy laas gekies het), en instellings (klank, vibrasie, minder beweging, kleurblindmodus, en watter wenke jy al gesien het: die eerste spel se wenke, “Hoe speel ek?” en die grys sementblokke). Bly tot jy jou blaaierdata uitvee.
stapel.v1.econ: Jou munte (ook dié wat jy in ’n muntwedstryd ingesit het, tot die uitslag), kragte, voorkoms (Uitdagersreeks-styl), jou toring se styl (Toring-styl: agtergrond, hyskraan en blokke) en rang. Bly tot jy jou blaaierdata uitvee (as jy ingeteken is, ook in jou gebêrde vordering: afdeling 2d; ’n muntwedstryd se inset bly net op hierdie toestel).
stapel.v1.lang: Die taal wat jy gekies het (Afrikaans of Engels).
stapel.v1.board: Jou lukrake spelernommer vir die daaglikse ranglys (dit word saam met jou resultaat gestuur, afdeling 2), of jy versteek wil wees, die dag waarop hierdie toestel die toetser-geskenk gekry het (toetsers bly versteek), die laaste dag waarvan jou resultaat gestuur is, en of ’n verandering nog gestuur moet word. Bly tot jy jou blaaierdata uitvee.
stapel.v1.refill: Hoeveel keer jy die Winkel se “Vul my munte aan” gebruik het (vandag en altesaam), sodat dit by die dag se perk bly. Bly op jou foon; niks daarvan word gestuur nie (behalwe in jou gebêrde vordering as jy ingeteken is: afdeling 2d).
stapel.v1.ranks, stapel.v1.retry: Jou rang in elke Uitdagersreeks-modus, en die ekstra pogings van die Daaglikse Toring (die gratis pogings en “Nog ’n kans”). Die rang gaan op jou spelerkaart na jou teenstander in ’n lewendige wedstryd, en die getal pogings saam met jou resultaat na die daaglikse ranglys (afdeling 2). Bly tot jy jou blaaierdata uitvee.
stapel.v1.tries: Hoeveel gratis pogings die Daaglikse Toring per dag het en van watter dag af, soos ons bediener laaste gesê het, sodat die spel ook sonder internet reg begin. Word nie gestuur nie. Word vervang wanneer die spel weer vra.
stapel.v1.signoffer: Die dag waarop die spel laas aangebied het om jou vordering met Google te bêre, sodat dit hoogstens een keer elke 60 dae vra. Word nie gestuur nie.
stapel.v1.cloud: Net as jy met Google ingeteken het (afdeling 2d): die sessiekode van hierdie toestel, ’n kort verwysing na jou rekening en die laaste afskrif van jou vordering wat met jou rekening gelyk was (so weet die spel wat op hierdie toestel nuut is en tel niks dubbel nie). Die sessiekode word uitgevee wanneer jy uitteken; die res wanneer jy jou rekening uitvee.
stapel.v1.week: Jou weekkis: watter dag se kis jy laaste oopgemaak het, hoeveel Reeksskilde jy het en hoeveel volle weke jy gespeel het. Word nie gestuur nie. Bly tot jy jou blaaierdata uitvee.
stapel.v1.remind: Net in die Android-toep: die tyd van jou daaglikse herinnering (of dat jy dit nie wil hê nie). Die herinnering word op jou foon self beplan as ’n Android-kennisgewing; niks daarvan word na ons gestuur nie.
stapel.v1.score: Net ’n datum en ’n hoogte: onthou dat vandag se Daaglikse Toring-resultaat reeds getel is, sodat dit nie weer gestuur word nie. Word elke dag vervang.
stapel.v1.shopSeen: Watter weergawe se Winkel jy al oopgemaak het, sodat die “Nuut”-kolletjie net vir nuwe goed wys. Word nie gestuur nie. Bly tot jy jou blaaierdata uitvee.
stapel.v1.chestSeen: Watter dag se weekkis jy met ’n tik oopgemaak het, sodat dit nie weer toe wys nie. Word nie gestuur nie. Word elke dag vervang.
stapel.v1.updateSeen: Net in die Android-toep: die weergawe waarvan jy die kaartjie “Nuwe weergawe!” al gesien het, sodat dit nie elke keer wys nie. Word nie gestuur nie. Bly tot jy die toep se data uitvee.
stapel.install.dismissed: Of jy die wenk “Sit Stapel op jou tuisskerm” toegemaak het, sodat dit nie weer kom nie. Word nie gestuur nie. Bly tot jy jou blaaierdata uitvee.
stapel.sponsors.v1: Die laaste lys van Borge, sodat die spel vinnig en ook sonder internet begin. Word ná 7 dae nie meer gebruik nie en met elke opdatering vervang.
stapel.v1.lewende: Net vir Die Lewende Toring in jou torings: jou stam, jou dorp se rekord (die meeste mense op een slag) en sy titel, wie al by jou ingetrek het en hoe dikwels, jou goue mense, en of jy die eerste wenk gesien het. Word nie gestuur nie. Bly tot jy jou blaaierdata uitvee.
stapel.v1.lewende.idees: Net vir die proef met Die Lewende Toring se idees (in die Uitdagersreeks): jou proef-rang en -vlak, die stam wat jy laas gekies het, watter idees jy gespeel het, jou stem en jou lukrake stemnommer (dié gaan saam met jou stem, afdeling 2). Die res word nie gestuur nie. Bly tot jy jou blaaierdata uitvee.
stapel.v1.span: Net vir Ons dorp: julle Weektoring se vloere (vorm, kleur, waar elkeen staan, hoe dit geland het, die styl van wie dit gebou het en hoeveel mense daarin woon), jou boubeurte, watter dae jy die Daaglikse Toring klaargemaak het en hoe hoog (vir jou Saterdag-kaartjie en bomme), of jy vandag al die rivier af gegly het, julle dorp se mense en ’n paar vorige weke se torings, plus jou spelernommer en sy geheime kode. Wat Ons dorp stuur, staan in afdeling 2 (Ons dorp). Bly tot jy jou blaaierdata uitvee.
stapel.v1.rvTaught: Net vir die Afgly: watter rivierlesse (spring, koes en Hanswors se roomtert) jy al op hierdie foon gesien het, sodat die spel dit nie elke keer weer stadig wys nie. Word nie gestuur nie. Bly tot jy jou blaaierdata uitvee.
stapel.v1.rvTold: Net vir die Afgly: in hoeveel ritte elke rivierwoord (soos “Stroomversnelling!” of “Hanswors!”) al op hierdie foon gewys is, sodat dit ná twee stil bly. Word nie gestuur nie. Bly tot jy jou blaaierdata uitvee.
stapel.v1.hengel: Net vir Hengel: elke vis wat jy op hierdie foon gevang het (die soort, die gewig, die datum), jou visboek en watter wenke jy al gesien het. Word nie gestuur nie. Bly tot jy jou blaaierdata uitvee.
stapel.v1.rvtimer: Net as jy ?rvtimer=1 in die adres sit (’n toets vir die ontwikkelaar): die laaityd, geheue en haper-tellings van jou laaste 8 Glybaan-ritte en of die klein toetskassie aan is. Word nie gestuur nie. Bly tot jy jou blaaierdata uitvee.
stapel.rideHeal: Net vir hierdie besoek, en net as die Glybaan nie wou oopmaak nie: ’n merkie dat die speletjie reeds een keer vars gelaai is, sodat dit nie weer en weer laai nie. Word nie gestuur nie. Verdwyn as jy die blad toemaak.
stapel.v1.katrolStyle: Net vir Hengel in Toetsmodus: of jy met die nuwe katrol (skuif) of die ou een (draai) hengel. Word nie gestuur nie. Bly tot jy jou blaaierdata uitvee.
stapel.v1.rvGrind: Net vir die Afgly: of jy al die boomstam by ’n vurk gery het, sodat die wenk “Tik ⟵ ⟶ om jou balans te hou” nie elke keer weer wys nie. Word nie gestuur nie. Bly tot jy jou blaaierdata uitvee.
stapel.v1.rvRail: Net vir die Afgly: of jy al self van ’n boomstam in die rivier afgespring het, sodat die wenk “Swiep op: spring af en hou jou munte!” nie elke keer weer wys nie. Word nie gestuur nie. Bly tot jy jou blaaierdata uitvee.
stapel.v1.rvGrindOk: Net vir die Afgly: of jy al een keer heel oor ’n boomstam gebalanseer het, sodat die balans-afrigter se pyle nie elke keer weer wys nie. Word nie gestuur nie. Bly tot jy jou blaaierdata uitvee.
stapel.v1.rvSpace: Net vir die Afgly: of jy al die vuurpyl in die ruimte gestuur het, sodat die wenk “Sleep jou vinger om te vlieg” nie elke keer weer wys nie. Word nie gestuur nie. Bly tot jy jou blaaierdata uitvee.
stapel.v1.slag: Net vir die Vrugteslag: jou vrugtemandjie (piesangs, sapdose en waatlemoene van jou Daaglikse Torings), jou trofeë en hoeveel gevegte jy gewen en verloor het. Word nie gestuur nie. Bly tot jy jou blaaierdata uitvee.
stapel.v1.kasteel, stapel.v1.kasteeldae: Net vir Die Kasteelreeks (proef): hoe jou laaste sewe Daaglikse Torings gestaan het (elke blok se vorm, plek, kanteling en of dit Perfek, Goed of Skeef was) sodat hulle die torings van jou kasteel word, jou verdedigingsplan (watter dag se toring jou hoof-toring is en waar jou verdedigers, olie, ballista en pieke staan), jou trofeë, hoeveel gevegte jy gespeel en gewen het, munte wat jy gewen het totdat Stapel hulle in jou beursie sit, en watter wenke jy al gesien het. As die bediener Jou dorp ken, word jou kasteel (die torings en jou plan) gestuur sodat jou bure dit kan aanval (afdeling 2, Die Kasteelreeks); die res word nie gestuur nie. Bly tot jy jou blaaierdata uitvee.
stapel.v1.botsing: Net vir Blokbotsing: of jy die eerste wenk al gesien het, hoeveel gevegte jy gespeel en gewen het, en munte wat nog na jou beursie toe moet gaan. Word nie gestuur nie. Bly tot jy jou blaaierdata uitvee.
stapel.v1.gly: Net vir Glybaan: jou beste afstand, die man wat jy laas gekies het, jou vlak en opdragte, en munte wat nog na jou beursie toe moet. Word nie gestuur nie. Bly tot jy jou blaaierdata uitvee.
stapel.v1.dorp: Net vir Jou dorp (Steel en Wraak, afdeling 2): jou dorp se nommer, ’n geheime sleutel wat net hierdie toestel het (die bediener hou net ’n onomkeerbare afdruk daarvan), wat jou torings vir jou dorp verdien het totdat die bediener dit het, die dag van jou laaste muur, en die bediener se laaste antwoord (jou dorp, jou bure en die nuus). Bly tot jy jou blaaierdata uitvee.
lt.profile, lt.mode, lt.tribe, lt.played, lt.vote, lt.voter: Net op die proefblad Die Lewende Toring: jou proef-rang en -vlak, die idee en stam wat jy laas gekies het, watter idees jy gespeel het, jou stem, en jou lukrake stemnommer (dié gaan saam met jou stem, afdeling 2). Die res word nie gestuur nie. Bly tot jy jou blaaierdata uitvee.
Vanlyn-kas (service worker): Die speletjie se lêers, sodat dit sonder internet werk. Bly totdat ’n nuwe weergawe dit vervang.
stapel.launch: Net in die Android-toep: die uitdagingskakel waarmee die toep laaste oopgemaak is, en wanneer, sodat dieselfde skakel nie weer oopgaan as jy later na die toep terugkeer nie.
stapel.klop: Sessiegeheue van die oortjie: die hoogte en datum uit ’n vriend se uitdagingskakel, sodat die kieslys en die Daaglikse Toring daardie dag “klop … m!” kan wys. Word nie gestuur nie. Verdwyn wanneer jy die oortjie toemaak.
stapel.tab, stapel.adverteer.draft, stapel.adverteer.pending: Sessiegeheue van die oortjie: ’n lukrake kode wat onthou watter oortjie die spel oop het, en op die adverteer-bladsy jou halfingevulde vorm en ’n betaling wat nog loop. Verdwyn wanneer jy die oortjie toemaak.

12. Wysigings en kontak

Ons mag hierdie beleid verander. Die weergawedatum is bo-aan die bladsy. Is ’n verandering wesenlik, dan stuur ons ’n e-pos aan ons huidige Borge. Vrae oor jou inligting kan jy rig aan lekkerlocal.apps@gmail.com of aan ons Inligtingsbeampte.